గ్రీన్ టీ

గ్రీన్ టీ 


ఈ రోజుని మొదలెట్టడానికి 
గొంతు సవరించుకుంటాను 
మనసూ సరిచేసుకుంటాను 

డిసెంబర్ చలి 

వల వేసినట్టు 
కాళ్ళ చుట్టూ పెన వేసుకొని  వుంది 

బైట ఎదో విజిల్ శబ్దం 
శ్రమ శకటం ఎదో 
అప్పుడే బయలు దేరింది 
జ్యూయ్యు జ్యూయ్యు మని 
బండ్ల శబ్దం దూరంగా 
పక్షుల చిక్ చిక్ రావాలు 
చెవుల్లోనే 

పచ్చని చెట్లు అలా 
నిలబడిపోయి చూస్తున్నాయి 
కొబ్బరి చెట్టు ఏమో 
కళ్ళు అన్నీ తెరుచుకుని 
ఆకుల సందుల్లోంచి 
అన్నీ గమనిస్తోంది 

అలవాటే లే ఈ కలానికి 
కనిపించిన ప్రతిదాన్ని 
ఏరి భద్రపరుచుకోవడం 
ఎక్కడ పారేసుకున్నామో  
అక్కడే వెదుక్కోవడం

గ్రీన్ టీ 
వేడివేడిగా గొంతును 
శృతి చేస్తోంది 
ఇక మొదలవుతుంది 
ఆత్మారాముడి గోల 

ఇంక అంతా కల కల 
కల చెదిరిపోయినట్టు 
కాలం వల వేసి 
గిల గిలా బిగించినట్టు 

గాలి అలల లెక్క తేలేసరికి 
వెలుతురు పిట్ట ఎగిరిపోతుంది