ఉదయం మీది ప్రేమ

ఉదయం మీది ప్రేమ 

 కన్నీటి తడిఆరకుండానే 

ఒంటరి తీరం 

నిదురలోకి జారిపోతుంది 

అలసట ఉంటుంది 

అలవాటైన ఆటు పోట్లు ఉంటాయి 

కాలం దారాల మీద 

కాగితం పడవల్లా 

అందరం వేలాడుతుంటాం 

ఆశా నిరాశ కోసల మధ్య ప్రయాణానికి 

నిద్ర కాసేపు విరామం 

*          *             *

ఇంకొంచెం సేపు పడుకుందామనే 

రెండో ఆలోచనే రాని 

సంపూర్ణమైన నిద్ర లోంచి 

మెల్ల మెల్లగా కనులు తెరిచే .. 

ఈ ఉదయం ఉంది చూశావూ .. 

నీ ప్రేమంత స్వఛ్ఛమైనది 

అది నా హృదయం లోంచి 

కాగితం మీదకు దూకే వేగం 

నీ ఒక్క దానికే తెలుసు .. 

ఈ ఉదయమే .. 

ఒక ముగిసిన ప్రయాణం లోంచి 

మళ్ళీ మొదలయ్యే  నీ ప్రణయం .. 

అని .. నేనంటే 

అచ్చంగా నువ్వు నవ్వినట్టే 

కవిత్వమూ ..ఇక చాల్లే ! ..అంది