పిడికెడంత ప్రేమ

 నడి రాతిరి ,

ఆకాశం ఆదమరిచి నిదురోయే వేళ

సైకిల్ తొక్కుకుంటూ ,గని పని నుంచి వచ్చి

ఒరే పెద్దా !అని కుదిపి ,కుదిపి

నిదుర లేపేవాడు నాన్న  నన్ను

నాన్న స్పర్శ కంటే , ' పెద్దా' అనే పిలుపు లోని

మాధుర్యమేదో ,నా నిద్రమత్తు ని వదిలించేది

                      *****

అమ్మకి తెలుసు నాన్న గారాబం

రెండు కోడి గుడ్ల కూర వండితే

తను సగం తినేది ,రెండో సగం నాన్నకి

నాకోసం ప్రత్యేకం ఒక్కటి !

                       *****

గనిలో ,పనిలో అలసిన నాన్న

తన కష్టమంతా మర్చిపోయు

నాన్ను లేపి ,కూర్చో బెట్టి

తన ప్రేమను దాచుకోలేని తనా న్ని

మొత్తంగా పిసికి  కలిపి  

గోరుముద్దలు  తినిపించేవాడు

               *****

మళ్లి  ఈ నాటికీ

నడిరాతిరి వేళ

ప్రియా ! నీ పిలుపులు

చందమామ కబుర్లు

పిడికెడు ప్రేమను దాచుకోవడం లో విపల్మయ్యే

విరహ హృదయాలు 

*****

పుట్టెడు దుక్కాన్ని దిగమింగుతాం 

పిడికెడు ప్రేమను దాచుకోవడంలో 

విఫలమౌతున్నాం ;అప్పుడు,ఇప్పుడూ 

నాన్న,అమ్మ;నువ్వు,నేను .