గుండె చప్పుడు

గుండె చప్పుడు

నువ్వే గుర్తొస్తావు

ఒక అపరాధ భావాన్ని ఎక్కుపెట్టుకుంటూ ..

ఏంచేయను ?

వేటగాడి బాణానికి గాయపడ్డ నోరు లేని పక్షిలా
విలవిల్లాడిపోతాను
నేనేంటి ?నేను చేసిన తప్పేంటి ?
జవాబు లేని అనాది  ప్రశ్న ఒకటి
ఆదిమానవుడిలా నిలదీస్తుంది

నీకు నువ్వుగానే పరిమళాల మాలగా
నన్ను అల్లుకుపోయావు
సముద్రపు అల వలే
అనంతమైన కలల ప్రపంచం లోకి
లాక్కెళ్లిపోయావు
చిన్న పిల్లాడిలా ఆనందపడ్డానని
చెప్పట్టానికి ఇప్పుడు మాటలు కూడా చాలవు

ఐనా మన మధ్య తుఫానులు లేవని కాదు
సునామీలు రాలేదని  కాదు
కానీ, కదల బారుతున్న భూమి పలకల వల్లే
పెనవేసుకున్న ప్రేమ
ఖండ ఖండాలుగా విస్తరించిందే  తప్ప
కలవరపడలేదు ఎప్పుడూ ఇంతగా ..

మరి కథ ఎక్కడ అడ్డం తిరిగింది ?

నేను చెప్పుకునే  సమాధానం కన్నా
మళ్లి నీ గుండె చప్పుడే వినాలని వుంది .